జబల్​పూర్​​ నుంచి వచ్చిన ఏడు డెడ్​ బాడీలు - గాంధీ మార్చురీ వద్ద కుటుంబ సభ్యులకు అప్పగింత

జబల్​పూర్​​ నుంచి వచ్చిన ఏడు డెడ్​ బాడీలు - గాంధీ మార్చురీ వద్ద కుటుంబ సభ్యులకు అప్పగింత

సికింద్రాబాద్​ ఫిబ్రవరి 12 (ప్రజామంటలు) :
 
మహా కుంభమేళా నుంచి తిరిగి వస్తున్న నగరానికి చెందిన ఏడుగురు మధ్యప్రదేశ్ లోని జబల్ పూర్ లో జరిగిన రోడ్డు ప్రమాదంలో మృతి చెందిన విషయం తెలిసిందే. జబల్​ పూర్​ లో పోస్టుమార్టం నిర్వహించి, వారి  మృతదేహాలను రెండు అంబులెన్స్​ లల్లో  బుధవారం గాంధీ ఆస్పత్రి మార్చురీ వద్దకు తీసుకుని వచ్చారు.

ఉప్పల్ తహసీల్దార్ వాణి రెడ్డి ఆధ్వర్యంలో డెడ్​ బాడీలను కుటుంబసభ్యులకు చూపించి, నిర్దారించుకొని  పోలీసులు మృతుల కుటుంబాలకు ఆయా మృతదేహాలను అప్పగించారు. మృతులకు సంబందించిన బ్యాగులు, ఇతర సామాగ్రిని కూడ జబల్​ పూర్​ నుంచి అంబులెన్స్​ లో తీసుకువచ్చి, ఇక్కడి వారి ఫ్యామిలీ మెంబర్స్​కు అప్పగించారు.

చనిపోయిన తమ వారి సామాగ్రిని చూసిన వారి కుటుంబసభ్యులు కన్నీరు మున్నీరయ్యారు. మృతుల కుటుంబసభ్యులు, బంధువుల రోధనలతో గాంధీ మార్చురీ ప్రాంతంలో విషాద ఛాయలు అలుముకున్నాయి.  ప్రభుత్వ ఉచిత పార్థీవదేహ వాహనంలో డెడ్​ బాడీలను వారి స్వగృహాలకు తరలించారు. అందులో నాచారంకు చెందిన శశికాంత్ (38), మల్లారెడ్డి (60), సంతోష్ కుమార్ (47), రవికుమార్ (60), బాలరాజు (31), తార్నాక కు చెందిన ప్రసాద్ (54), సైదాబాద్ కు చెందిన ఆనంద్ కుమార్ (47) ఉన్నారు. 

వీహెచ్ సంతాపం : 
మాజీ రాజ్యసభ సభ్యుడు, కాంగ్రెస్ పార్టీ సీనియర్ నాయకుడు వి. హనుమంతరావు బుధవారం గాంధీ ఆస్పత్రి మార్చురీ వద్దకు వచ్చారు. మృతుల కుటుంబ సభ్యులకు ప్రగాఢ సానుభూతి తెలిపారు. దైవదర్శనానికి వెళ్లి తిరిగి వస్తుండగా రోడ్డు ప్రమాదంలో ఏడుగురు మృత్యువాత పడడం దురదృష్టకరమని అన్నారు. రాష్ర్ట ప్రభుత్వం మృతుల కుటుంబాలకు నష్టపరిహారం ఇవ్వాలని ఆయన కోరారు.