హెల్త్ మినిస్టర్​ గాంధీ దవఖాన ఆకస్మిక పర్యటన

 డ్యూటీ డాక్టర్ల గైర్హాజర్​ పై మంత్రి ఆగ్రహం
 చర్యలు తీసుకోవాలని డీఎంఈ కి ఆదేశం

సికింద్రాబాద్​ మార్చి 04 (ప్రజామంటలు) :

సికింద్రాబాద్​ గాంధీ ఆసుపత్రిని రాష్ర్ట వైద్య, ఆరోగ్య శాఖ మంత్రి దామోదర రాజనర్సింహ మంగళవారం ఆకస్మికంగా సందర్శించారు. గాంధీకి రాగానే నేరుగా అవుట్​ పేషెంట్​ వార్డుకు వెళ్ళిన మంత్రి అక్కడున్న పేషెంట్లు, వారి సహాయకులతో మాట్లాడారు. ప్రసూతి వార్డులో అప్పుడే పుట్టిన శిశువులను పరామర్శించిన మంత్రి అక్కడున్న సౌకర్యాలపై పేషంట్లను అడిగి తెలుసుకున్నారు.

 ఆసుపత్రిలో సమస్యలు, సౌకర్యాల గురించి అడిగి తెలుసుకున్నారు. డాక్టర్ల అటెండెన్స్​ బుక్​ ను తెప్పించుకొని వారి హాజరును మంత్రి పరిశీలించారు. కొందరు డాక్టర్లు గైర్హాజరు అయినట్లుగా గ్రహించిన మంత్రి ముందస్తు సమాచారం లేకుండా డ్యూటీకి గైర్హాజరైన డాక్టర్లపై చర్యలు తీసుకోవాలని అక్కడే ఉన్న డీఎంఈ డా.నరేందర్​ కుమార్​ ను ఆదేశించారు. ఓపీ వార్డులో ఉండాల్సిన ఆయా డిపార్ట్​ మెంట్​ ల ప్రొఫెసర్లు, అసోసియేట్​ ప్రొఫెసర్లు అందుబాటులో లేకపోవడంతో మంత్రి ఆగ్రహించారు.

వారికి షోకాజ్​ నోటీసులు ఇచ్చి, వివరణ తీసుకోవాలని సూపరింటెండెంట్​ డా.రాజకుమారిని ఆదేశించారు. నర్సుల అటెండెన్​ రిజిస్టర్​ లేకపోవడంపై మంత్రి విస్మయం వ్యక్తం చేశారు. అసలు గాంధీలో పాలన యంత్రాంగం అస్తవ్యస్తంగా ఉండటంతో ఇలాంటి లోపాలు నెలకొన్నాయని మంత్రి అభిప్రాయ పడ్డారు. ఈసందర్బంగా మంత్రి ఓపీ వార్డుతో పాటు రెండో ఫ్లోర్​ లోని జనరల్​ మెడిసన్​ ఫిమేల్​ వార్డు, రేడియాలజీ డిపార్ట్ మెంట్ లోని ఎక్స్​ రే, ఎంఆర్​ఐ, సిటీ స్కానింగ్​, ఐవీఎఫ్​ కేంద్రాలకు వెళ్ళి, పరిశీలించారు.

అయితే ఐవీఎస్​ ప్రారంభమై ఏండ్లు గడుస్తున్నా ఫలితాలు ఆశించిన స్థాయిలో రావడం లేదని అసంతృప్తి వ్యక్తం చేశారు. ఈమేరకు సంబంధిత డాక్టర్లకు షోకాజ్​ నోటీసులు ఇవ్వాలని డీఎంఈ ని మంత్రి ఆదేశించారు. అనంతరం మంత్రి మీడియాతో మాట్లాడుతూ..గాంధీలోని పలు అంశాలపై సీరియస్​ గా రివ్యూ చేయాల్సి ఉందన్నారు. ఇక్కడ సాగుతున్న ఇన్​ఫ్రాస్ర్టక్చర్​ పనులను వేగవంతం చేయాలని అధికారులను ఆదేశించినట్లు తెలిపారు. మెడికల్​, నాన్​ మెడికల్ ఉద్యోగులు ​ ఎవరైన ఖచ్చితంగా డ్యూటీలు చేయాలని, లేనిపక్షంలో కఠిన చర్యలు తప్పవన్నారు.

గాంధీకి వచ్చే పేదలకు అందే వైద్యంలో నిర్లక్ష్యాన్ని తమ ప్రభుత్వం ఊపేక్షించదని వార్నింగ్​ ఇచ్చారు. తమ ఆకస్మిక తనిఖీలు తరుచుగా కొనసాగుతాయన్నారు. మంత్రి వెంట నాగర్​ కర్నూల్​ ఎమ్మెల్యే డాక్టర్​  రాజేశ్​ రెడ్డి తో పాటు డీఎంఈ (అడ్మిన్​) డాక్టర్​ నరేందర్​ కుమార్​, సూపరింటెండెంట్​ డా.రాజకుమారి, ఆర్​ఎంవో లు, ఆయా డిపార్ట్ మెంట్ హెచ్​ఓడీలు, సిబ్బంది ఉన్నారు.

తెలంగాణ భవన్​ కాదు...ఇప్పుడున్నది గాంధీ భవన్​..

మంత్రి దామోదర రాజనర్సింహ గాంధీ విజిట్​ తర్వాత ఓపీ వార్డునుంచి బయటకు వచ్చే సమయంలో అక్కడున్న ఓ వృద్దురాలు మంత్రిని కలసి తన గోడు వెల్లబోసుకుంది. తాను సదరం సర్టిఫికెట్​ గురించి తెలంగాణ భవన్​ చుట్టూ తిరిగిన పని కాలేదని వాపోయింది. అందుకు స్పందించిన మంత్రి ఇప్పుడున్నది గాంధీ భవన్​...ఒక్క కాగితంపై నీ సమస్య రాసి ఇస్తే పని అయిపోతుందని భరోసా ఇచ్చారు. తన ఆపీస్​ అడ్రస్​ తో పాటు ఫోన్​ నెంబర్​ రాసి ఇచ్చారు. సదరు వృద్దురాలికి కొంత ఆర్థిక సాయాన్ని అందచేశారు.