పూట గడవని దుస్థితి...మందులు కొనలేని పేదరికం *అండగా నిలిచిన ఎన్జీవో సంస్థ

సికింద్రాబాద్, ఏప్రిల్ 01 ( ప్రజామంటలు ) :

 

అసలే పేదరికం..ఆపై అనారోగ్య సమస్యలు..శరీరం సహకరించక మద్యలోనే చదువు ఆపేసిన  యువతికి ఓ సంస్థ అండగా నిలిచింది. వివరాలు ఇవి..బన్సీలాల్ పేట డివిజన్ జయనగర్ కు చెందిన డి.దశరథ్, వాణీ ల కుమార్తె పూజిత(17) డయాబెటిక్, థైరాయిడ్ తో బాధపడుతోంది. తన మూడేండ్ల వయస్సు నుంచే జువైనైల్ మధుమేహ వ్యాధితో ఇబ్బందులు పడ్డ పూజిత అనారోగ్య సమస్యలతో స్కూల్ కు వెళ్ళలేక 9వ తరగతిలోనే చదువు ఆపేసింది. అప్పటి నుంచి ఇంటిలో ఉంటున్న పూజిత టైలరింగ్ నేర్చుకొని, చిన్న,చిన్న కుట్టు   పనులుచేస్తోంది. తండ్రి దశరథ్ ప్రమాదవశాత్తు నిర్మాణంలో ఉన్న బిల్డింగ్ పై నుంచి కిందపడి తీవ్రగాయాలపాలై,ప్రస్థుతం ఇంటివద్దే ఉంటున్నాడు. తల్లి ఇండ్లల్లో ఇంటి పని చేస్తుంది. కుటుంబ పోషణ నే కష్టంగా మారిన నేపద్యంలో  పూజితకు మందులు కొనడం ఇబ్బందిగా మారింది. ప్రతిరోజు నాలుగు డోసులు ఇన్సులిన్, థైరాక్సిన్ లాంటి అనేక మందులను వాడాల్సి ఉంటుంది. కూతురు అనారోగ్య సమస్య ట్రీట్మెంట్ భారంగా మారింది.   విషయం తెలుసుకున్న సొసైటీ ఫర్ రూరల్ డెవలప్మెంట్ (ఎస్ఆర్ డీ) సంస్థ నిర్వాహకులు  శ్రీనివాసరెడ్డి కష్టాల్లో ఉన్న పూజిత కుటుంబానికి అండగా నిలవాలని నిర్ణయించుకున్నారు. మంగళవారం ఎస్ఆర్డీ సిబ్బంది పూజిత ఇంటికి వెళ్ళి పలు రకాల నిత్యవసరాల వస్తువులతో పాటు  డయాబెటిక్, థైరాయిడ్ మందులను అందచేశారు. భవిష్యత్ లోను పూజిత కుటుంబానికి అండగా ఉంటామని ఎస్ఆర్డీ నిర్వాహకులు భరోసా ఇచ్చారు. కార్యక్రమంలో ఎస్ఆర్డీ ఆర్గనైజింగ్ కో ఆర్డినేటర్లు శివరాణి, ఇందిరాభారతి పాల్గొన్నారు.